कविता ..!

म्हणलं एकदा कविता करून बघावी
पण सुचेना , विषय घ्यावा तरी कोणता ?
मग म्हणलं कशाला विचारात पडता
चला , कवितेवरच करूया कविता

विषय ठरला असा तर वाटलं
म्हणलं शब्द लिहिले की झालं
लिहिण्यासाठी सुचावं लागत हे मात्र विसरलं
नकळत कवींसाठी कौतुक बाहेर पडलं

एक -एक शब्द दिसला उडत उडत येताना
हळूच येऊन आपापल्या जागी बसताना
या शब्दांनीच ओळ तयार झाली
वाटलं चला , सुरुवात तर झाली

मग दिसले विचार पळत पळत येताना
तौबा गर्दी करून मनात घर करताना
एक -एक विचार बाहेर पडू लागला
हळूच आपापला तो विस्तारत गेला

वाटलं चला , कविता पूर्ण झाली
म्हणलं चला , “बाप्पा ” ला दाखवू पहिली
तेवढ्यात शीर्षकाची आठवण झाली
अन पुन्हा “कविता ” च मदतीला धावून आली..